「國家打吡」跟尾爭冠未必砌盡
世界冠軍球會盃今晚喺阿聯酋上演王者戰，由衞冕嘅歐洲班霸皇家馬德里火併巴西勁旅甘美奧。皇馬4強戰對住東道主球隊艾查捷拉只係驚險反勝晉級，決賽面對實力更強嘅甘美奧，皇馬優勢未必如球迷想像咁大，加上下周末返西甲同巴塞合演「國家打吡」，皇馬讓球主客和要讓兩球未免辣咗啲，捧1.82倍讓球客勝好過！
（奇妙電視77、有線61及201台周日凌晨1時直播）
銀河艦隊欠埋門一腳
皇馬今次力爭衞冕世冠盃都算精銳盡出，不過演出稍稍不似預期，4強戰面對實力差幾班嘅艾查捷拉，皇馬一度畀對手成功偷雞先拔頭籌，好在危急關頭靠C朗及後備上陣嘅加里夫巴利入波，先反勝對手進身今晚決賽，但欠缺埋門一腳嘅問題再次表露無遺，今仗面對甘美奧必定更難踢。況且皇馬亦有後顧之憂，下周末主場要同巴塞上演「國家打吡」，勝負關乎爭標機會同面子問題，今場「銀河艦隊」就住踢不足為奇。
甘美奧硬淨有前有後
甘美奧憑贏得南美自由盃而亮相今屆賽事，陣內新星已經畀歐洲豪門嘜實，中場艾法亞美路近日就畀人影到着上巴塞波衫，登陸歐洲只係遲早嘅事。雖然佢因傷今次冇隨隊，但甘美奧實力依然不容忽視，除有前多蒙特前鋒巴里奧斯外，後防核心華特簡尼紐文亦經驗豐富，呢位阿根廷後衞2007年就曾帶領過阿甲聖羅倫素喺世冠盃決賽同皇馬交手，仲成功嘜到C朗冇波入，今次重遇相信會照辦煮碗，讓球主客和皇馬讓兩球略嫌過火，捧甘美奧讓球客勝好過。