主力前鋒剛復出又傷過
上季排澳職包尾同尾2嘅紐卡素噴射機同阿德萊德聯，今日將會成為前列大戰嘅主角。主場出擊嘅紐卡素噴射機今季脫胎換骨，超強火力橫掃澳職，不過今仗大戰前偏偏有王牌射手奧當路雲重傷，面對愈戰愈勇嘅阿德萊德聯全無勝算，讓球盤阿德萊德聯受讓平手、半球，必捧下盤。
（有線64、203台及無綫myTV SUPER T303台周六下午2時35分直播）
奧當路雲缺陣即跌Watt
紐卡素噴射機今季打造奧當路雲、納博特同柏拉杜斯進攻三叉戟，10場聯賽勁入23球，強大火力係球隊爆發關鍵，可惜入咗7球嘅愛爾蘭前鋒奧當路雲，養傷3仗後上仗復出，立即又再打柴，消息指佢鼠蹊傷患可能要抖3個月咁耐。奧當路雲今季踢7場聯賽球隊有5勝2和，但佢缺陣嘅3仗就輸咗2仗，認真大鑊。
阿德萊德聯近4戰3勝
除咗奧當路雲之外，紐卡素噴射機門將積克鄧肯、守將丹尼爾佐治夫斯基同委內瑞拉國腳朗奴華加斯都養傷，戰鬥力大打折扣。相反，阿德萊德聯近期愈踢愈好，近4場聯賽贏咗3場，唯一輸波係僅敗於衞冕「一哥」FC悉尼，西班牙中場伊沙亞斯據聞更準備明年入籍澳洲，有望出戰世界盃決賽周，依家梗係要交足貨啦，今場阿德萊德聯下盤穩陣呀！