曼市雙雄分途捱細界
砌完打吡疲兵迎快車
今晚英超續演快車，曼城同曼聯分途出擊，面對牌面較弱球隊，但英超中下游球隊體力化踢法向來難應付，加上「曼市雙雄」剛喺打吡激戰完，未及回氣下想大炒有難度，曼城作客史雲斯及曼聯主場對般尼茅夫，兩場同吼細盤！
藍月亮遇鐵桶陣頭雲
「1哥」曼城作客尾2嘅史雲斯，實力睇落懸殊，但「藍月亮」近期遇弱反而贏得驚險，上月尾至今月頭，喺聯賽接連出戰哈特斯菲爾德、修咸頓及韋斯咸，都係喺末段絕殺對手，今仗未必可輕鬆篤破史雲斯嘅鐵桶陣。史雲斯今晚必囤重兵死守，佢哋近6仗聯賽全開3球或以下，今仗中位數3.5球細盤有1.59倍咪錯過。
（Now 621及LeSports周四凌晨3時45分直播）
紅魔啞火折茅冇咁易
至於遲少少出場嘅曼聯主場對般尼茅夫，紅魔上仗打吡被破主場不敗身，士氣受創，況且佢哋鋒力欠銳，盧卡古有幾頹大家都知，保羅普巴繼續停賽，兩大創造力強嘅中場桑馬達同米希達利恩唔受重用，曼聯入波板斧真係唔多。
般尼茅夫近期防線回穩，近6仗聯賽僅1敗兼只失5球，就算對住熱刺及車路士等勁旅都係僅輸0比1，防守力可靠，今晚作客奧脫福唔容易被擊破，2.5球細盤有2.25倍好分頭，抵捧！
（Now 622及LeSports周四凌晨4時直播）