歐聯16強早前已抽籤完畢，雖然車路士抽中對巴塞隆拿，但其餘4支英超球隊嘅籤運都唔錯，只係1場更似決賽嘅戲碼，竟然提前喺16強上演，就係衞冕嘅皇家馬德里火併巴黎聖日耳門（PSG），可謂萬眾期待。
計劃同雷神去巴拿貝惜計錯數
其實未進行16強抽籤前，PSG被多間博彩公司列為奪冠大熱，甚至比皇馬、巴塞及曼聯等傳統豪門更受追捧。由於筆者經常為「三色台」評述法甲，對PSG有更深入了解，今季加入尼馬及基利安麥巴比，兩人年輕力壯，具備技術、速度及創造力，將鋒線提升至另一個層次，而且佢哋能牽制對方多名球員，間接放生中鋒卡雲尼，等佢專心喺門前把握機會，難怪呢把「3叉戟」令敵軍腳震。PSG近年壟斷法甲，自然想進一步稱霸歐聯，捧盃嘅飢渴感猶勝連續兩屆封王嘅皇馬。
筆者本來想同著名騎師「雷神」莫雷拉，喺2月中去巴拿貝球場舉行睇皇馬對PSG嘅首回合，諗住「雷神」周三跑完夜馬，好似名著《80日環遊世界》咁，向東行會賺一日，以為當地遲香港一日，齊齊搭飛機趕得切去西班牙睇波，可惜我哋計錯數，歐洲只係比香港遲8小時，跑完夜馬去係趕唔切，所以惟有喺屋企睇波算數。