法蘭克福史浩克細均力敵
今晚德甲直播賽事係法蘭克福主場對史浩克04，目前喺聯賽榜分別排名第7同第2位，係勢均力敵嘅前列對決，兩隊都啱啱贏咗波，不過同樣搏到好殘，又累積唔少傷兵，加上德國近期天寒地凍，比賽咁密真係走都走唔郁，今仗預期係一場拉鋸戰，賽前投注首選1.63倍嘅中位數2.5球細盤。
法蘭克福上輪作客2比1擊敗漢堡，除咗喺聯賽榜升上第7位，仲升格首循環作客之王，至今9場作客取得5勝3和1負佳績，得分仲多過榜首拜仁兩分，不過佢哋贏漢堡之役其實相當受壓，仲大部分時間處於下風，勝負關鍵係門將分野，法蘭克福門神哈迪基屢救險球，贏晒不斷派膠嘅漢堡守門員馬菲亞尼。不過，法蘭克福作客叻主場曳，主場成績位列德甲尾三，至今7仗主場只贏過兩場咁大把，仲只係險勝弱旅史特加同雲達不來梅，7場波入得7球相當失禮。尤其佢哋中場大哥奇雲保定，今季3個入波都係作客取得，主場到依家都未有貨交。
近3對賽總入球最多1粒
史浩克近10輪聯賽不敗，已經殺上聯賽榜次席，僅次於拜仁，不過上仗贏奧格斯堡都係大話夾好彩，領先兩球畀人追和仲輸埋個勢，尾段靠一個幸運12碼奠勝執番身彩，呢場波虛耗咗佢哋唔少體力，相信今場作客都唔敢亂攻，尤其法蘭克福嘅商業銀行球場向來係佢哋凶地，佢哋自2010年至今已經未喺呢度贏過波，近6次到訪有5次入唔到波。睇番上輪德甲，基於快車場合隊隊攰爆，9場比賽有6場開細盤，強如拜仁同利華古遜主場出擊都只係好辛苦咁入得1粒，加上今仗兩軍近3次對賽總入球最多只係1球，今仗入波一樣唔會多。