8點開Show陪你送飯
西甲「國家打吡」今晚8點開Show，皇家馬德里坐鎮巴拿貝激砌巴塞隆拿！皇馬剛憑C朗及傷愈復出嘅加里夫巴利入波，成功衞冕世冠盃，「BBC」鋒線重現光芒；榜首巴塞火力屬西甲最強，加上美斯每逢作客巴拿貝特別醒神，睇番巴塞近4次聯賽作客皇馬都開4球或以上，兩軍鬥晒冷下，必推中位數3.5球嘅2倍大盤！
（Now 632台周六晚8時直播）
「BBC」光芒重現易搵食
皇家同巴塞嘅「國家打吡」，不嬲象徵住中央政府同地方勢力嘅對決，適逢加泰獨立風波正盛，今場只會更加激。皇馬大戰前成功衞冕世冠盃，返主場肯定會喺死敵面前響盡「世界冠軍」個朵，但作客嘅巴塞冇面畀，講明到時唔會列隊祝賀，兩軍未埋牙已經火藥味十足。
皇馬現時喺聯賽落後巴塞11分之多，若然仲想爭西甲冠軍，今場冇得諗要擸盡3分，幸「銀河艦隊」近期表現回勇，上輪聯賽主場大炒西維爾5蛋，連同衞冕世冠盃，攻力及信心返晒嚟，加上巴塞後衞烏姆迪迪缺陣，重拾光芒嘅主隊「BBC」組合更易搵食。
美斯踩場巴拿貝特醒
巴塞季前喺西超盃畀皇馬擊潰，加上尼馬轉投PSG，以及象徵加泰精神嘅球會陷入場外政治風波，唔少球迷諗住佢哋今季危危乎，但巴塞就用表現話畀大家知「諗多咗」，美斯至今聯賽轟入14球，配合拍檔蘇亞雷斯及奇兵荷西保連奴，鋒力唔差得過上季，單係呢位阿根廷球王過去就曾14次喺巴拿貝射破皇馬大門。睇番兩軍近4次會師巴拿貝，全開4球或以上，今場中位數3.5球嘅大盤值得追捧。