利物浦送大禮
狐狸作客更搶韁
今晚英超上演快車檔第3擊，由近期「入波當食生菜」嘅利物浦主場對李斯特城，紅軍「古埃及文明」除沙迪奧文尼腳風稍為欠順外，其餘3位弗到爆，對手「狐狸」最擅長打反擊，作客入波仲多過主場，中位數3/3.5球嘅大盤有1.75倍，絕對係2017年尾最佳賀禮！
（Now 622及LeSports周六晚11時直播）
英超快車嚟到第3站，對利物浦嚟講唔算辛苦，事關佢哋第1場提早喺周五晚踢，同第2仗對史雲斯中間有3日時間休息，再抖多3日今晚先鬥李斯特城，對兵源算充足嘅「紅軍」嚟講簡直係「優差」，尤其上仗大炒史雲斯5蛋未受考驗，根本同練波差唔多。
紅軍入波僅次曼城
利物浦踢咗20場聯賽入46球，喺英超僅次於恐怖級別嘅曼城，甚至高過晒上季同時期任何一隊。不過利物浦失波都唔少，平均每場失多過1球，雖然球隊剛以超高價7,500萬鎊收購修咸頓中堅華基爾雲迪積克，但佢今場仲未能替主隊披甲，李斯特城要攻陷脆弱嘅「紅軍」防線唔難，玩大盤吸引過讓球盤。
作為一支中型班嚟講，李斯特城入球能力相當唔錯，僅差過Big 6球隊排第7，如果單計作客表現更叻過阿仙奴，10場作客入咗17球，占美華迪、岡崎慎司同馬列斯都係反擊高手，不過佢哋防線同樣唔算穩，呢個對碰捧大盤啱數。睇番首循環交手利物浦作客贏3比2，兩隊踢得非常開放，若非占美華迪射失12碼，有機會出現更多入球。賽前高普亦向對手大笠高帽，話李斯特城自佩爾接手後進攻更有效率，今場一於捧大盤。