曼城細盤接福
雙槍缺陣焗歎慢板
曼城2018年大鑊了！「藍月亮」前晚喺英超作客悶和水晶宮0比0，聯賽18連勝斷纜之餘，仲有射手加比爾捷西斯及助攻王奇雲迪布尼雙雙受傷，其中「耶穌仔」加比爾更要抖1至兩個月，而奇雲迪布尼亦好可能缺陣今晚主場鬥屈福特，攻力勢必大打折扣。加上曼城3日兩戰，體力負荷極大，今場點都要慳啲使歎慢板，中位數3.5球嘅細盤，有1.82倍夠晒穩陣！
（Now 621及Le Sports周三凌晨4時直播）
「藍月亮」放甩太多易鬆懈
曼城今季順風順水，但去到上場就露疲態，全靠門將艾達臣摩拉斯補時救出12碼，唔使輸執番1分真係偷笑。事實上「藍月亮」狀態有走下坡迹象，近兩場英超入得1球，攻力冇早前咁銳利，出現呢個情況，好可能因為球隊領先太多，球員作戰心態難免有所鬆懈。不過今仗更大鑊喺中前場嘅加比爾捷西斯及奇雲迪布尼上仗受傷，今晚唔使預佢哋，前者今季各項賽事上陣25次，有8球進帳及2次助攻，後者就入咗7球交出12次助攻，「雙槍」一齊缺陣，曼城個進攻體系隨時瓦解。
快車尾站球員搏到莫氣
英超聖誕新年快車嚟到尾站，曼城搏咗3場緊密賽程後，班球員難免莫氣，主場對住實力較弱嘅屈福特，大可趁機抖一抖，以領隊哥迪奧拿最擅長嘅控球在腳踢法，希望將體力消耗減到最低，只要入到波先，應該會猜到尾，冇必要浪費力量猛攻，最緊要唔好再畀主力受傷。
屈福特近6場聯賽作客輸5場，加埋射手迪尼停賽，今日遠征曼城真係冇得打，惟有死守避免輸得太難睇。睇番屈福特近5次所有賽事作客曼城，有4次總入球係3球或以下，對上兩次都只係輸0比2，今場亞洲盤曼城讓兩球有啲難估，中位數3.5球嘅細盤相對抵玩。