FC悉尼主場爆機
近9次聯賽對碰全勝
澳職今日上演榜首大戰，由聯賽榜「1哥」FC悉尼主場迎戰「2哥」紐卡素噴射機。FC悉尼聯賽累積7連勝，繼續以近乎無敵姿態領導群雄；相反噴射機上仗被墨爾本勝利打斷3連勝走勢，而且近9次常規賽對FC悉尼全數落敗，今場讓球盤FC悉尼讓一球，一於捧「上盤」打響新年頭炮。（有線64、203台及無綫myTV SUPER 303周三下午4時50分直播）
經過13輪聯賽後，FC悉尼已拋離紐卡素噴射機8分，足證雙方實力同穩定性都有明顯分野。FC悉尼上仗以6比0大勝珀斯光輝，除咗錄得聯賽7連勝，近4仗更狂轟18球，火力驚人。同時FC悉尼連續兩仗主場出擊，毋須舟車勞頓，亦有一定優勢。
噴射機對戰9連敗
噴射機上仗作客1比2不敵墨爾本勝利，聯賽3連勝走勢告終，如非對方射失12碼，噴射機恐怕輸得仲慘。事實上，噴射機近8場聯賽只有1仗保持清白身，其餘7仗共失10球，以一支前列球隊嚟講，防守表現完全唔合格，加上噴射機近9次常規賽對FC悉尼，竟然錄得全敗，擺到明畀FC悉尼食住，今仗好大機會再輸多鋪，讓球盤主場嘅FC悉尼都只係讓一球，有強大往績數據支持之下，「上盤」抵玩。