堤格雷斯半場和好路
墨超次階段常規賽周六早上開打，首階段季後賽盟主堤格雷斯打頭陣作客普埃布拉。堤格雷斯雖然擁有一條豪華鋒線，不過首階段作客成績唔算突出，比賽初段慣踢穩陣波；普埃布拉實力所限想攻亦有心無力，今仗首選半場和。
（周六早上9時開賽，馬會網上文字直播）
堤格雷斯雖然係首階段季後賽盟主，不過常規賽只排第2，而且單計常規賽作客成績，佢哋9場只得2勝，勝出率不足3成，水準同主場差好遠。堤格雷斯前線星光熠熠，無論厄瓜多爾國腳安拿華倫西亞、智利國腳伊度亞度華加斯或法國箭頭基格納都獨當一面，所以佢哋比賽初段根本唔使同你急，特別係作客賽事，佢哋首階段常規賽9仗作客有7次開出半場和就係最好證明。
普埃布拉首階段常規賽排名第15，總計對上6個階段賽事平均分，佢哋仲未擺脫降班威脅，仍要搶分護級，不過佢哋喺首階段3支入波最少嘅墨超球隊之一，17場僅入14球，要攻破堤格雷斯大門亦唔不容易，今場捧半和最穩陣。
阿特拿斯坐和望贏
另一場次階段賽事由阿特拿斯主場鬥利昂。阿特拿斯近3次主場鬥利昂未輸過，而且佢哋仲要搶分護級，戰意靠得住。利昂對上3個階段首戰全部輸波，包括最近1次於主場淨吞阿特拿斯3蛋，平手盤捧阿特拿斯。
（周六早上11時開賽）