聯賽渺茫曼聯爭盃打甩比
另1場英足盃第3圈，曼聯主場鬥英冠球隊打比郡，「紅魔鬼」曼聯雖然傷兵一大籮，但上仗英超殘陣出擊之下，反而擊敗愛華頓，結束連續4場不勝頹勢，總算為領隊莫連奴減壓。其實曼聯爭英超機會非常渺茫，相信莫帥會更睇重盃賽，避免季尾四大皆空。同埋曼聯近4次英足盃對非英超球隊，有3次贏3球或以上，對弱隊絕不留情，「讓球主客和」曼聯讓兩球，照捧讓球主勝。
（Now 632周六凌晨4時直播）
曼聯傷兵名單上包括有前鋒盧卡古、伊巴謙莫域、中場費蘭尼、後衞艾歷拜利、路爾斯華倫西亞。不過，上仗作客愛華頓，由安東尼馬迪爾擔正攻堅，效果唔錯，佢仲取得入波。加上近3仗轟入3球嘅連格，呢對「極速組合」異常合拍，令曼聯火力不降反升。最重要係曼聯出戰英足盃對低組別球隊，都交足功課，上屆主場對兩支英冠球隊雷丁及韋根，都大勝4比0，今仗大炒打比郡，並唔出奇。
打比郡或留力爭升班
「綿羊」打比郡雖然排英冠第2位，但實力始終同英超一線強隊有好大距離，同埋佢哋以爭升班作為首要目標，未必對盃賽有興趣。打比郡今屆英聯盃被英冠下游球隊班士利淘汰，就係一大證明，今仗面對紅魔鬼，更加有大條道理「棄權」，專心踢好聯賽，希望下季升上英超。