車仔副選圍捕金絲雀
英足盃第3圈，周日凌晨車路士將會作客挑戰英冠球隊諾域治。車路士1月賽程幾密集，仲要多次面對同城死敵阿仙奴，領隊干地今仗英足盃如無意外將會派副選上陣，不過對手諾域治只屬英冠中游分子，車仔實力雄厚取勝綽綽有餘，而且球隊近8屆英足盃第3圈都贏對手2球或以上，呢場大勝冇走雞，讓球客勝實食冇黐牙。
（ViuTV 99及Now 633周日凌晨1時30分直播）
車路士啱啱經歷完聖誕新年快車，踏入2018年又要喺9日內連續踢英超、英足盃同英聯盃4場波，其中仲有2次要同強敵阿仙奴過招，絕對考驗領隊干地調兵遣將嘅能力。喺聯賽畀1哥曼城拋離16分嘅車仔，今季英超成功衞冕機會真係凍過水，所以干地唔排除會將目標轉向盃賽，呢場雖然會派副選迎戰，不過實力依然超班，輕取對手冇難度。
英冠排第13嘅「金絲雀」諾域治近期表現飄忽，同升班附加賽席位差成9分，嚟緊要專注聯賽，點會仲有力兼顧盃賽，尤其要留力下仗應付聯賽強敵布里斯托城，呢場盃賽面對英超3哥難有作為，揀讓球客勝。