哥帥有料遠勝回塘寸王
如果有追開呢個專欄嘅讀者都應該知道，筆者在今季英超開打3輪後曾提過，爭冠離唔開曼市雙雄，因為佢哋於季初所打出嘅氣勢甚有冠軍相，若果你對邊隊較為睇好可押注多啲，亦可買少少另一隊當保本。果然，曼城超乎理想地一放絕塵，踢咗22輪豪取20勝2和未輸過累積62分，甩開死敵曼聯15分之多，喺強度極高嘅英超取得如此開局佳績，非常難得。
調教球員功力盡現
曼城主帥哥迪奧拿之前執教巴塞大獲成功，好多人認為佢手執一副「靚牌」，無論係美斯、沙維、恩尼斯達均對其tiki taka打法瞭如指掌，就算搵其他人教都一樣成功。幸好經過1季半時間調整後，「藍月亮」打出強勁氣勢，哥帥以控球在腳為戰術基礎之下作出微調，當機立斷採用4141陣式，喺佢調教之下，史達寧從只擅於側擊嘅英式快速翼鋒，蛻變為能傳善射、懂得適時入楔埋門嘅影子殺手，而奇雲迪布尼及大衞施華組成嘅中場雙核，連同另一翼鋒利萊辛尼，在聯賽合共奉獻26次助攻，3人位列助攻榜頭3位。迪布尼當年效力車路士被「寸王」莫連奴放棄，輾轉在德甲打番起信心，佢唔係沙維嗰類中場指揮官，但技術全面兼後上衝擊力極強，大衞施華年過30反而打出最高水準，睇得出哥帥識得因事制宜之餘，調教球員之功力亦可見一斑。
相反，因擅於應變而確立名帥地位嘅曼聯領隊莫連奴，近年明顯「回塘」，尤其係佢過於注重防守，面對強隊先求唔輸不惜泊大巴，反而畀對手搶得主動致失分甚至輸波，出戰玩死守嘅中下游球隊，更凸顯「寸王」不擅調教進攻嘅弱點，就算贏波都贏得好辛苦。公平啲講，曼聯坐擁保羅普巴、盧卡古等高價球星，實力理應不在曼城之下，但「寸王」太過保守嘅戰術風格，未能將麾下球員嘅能力發揮到極致，成為畀曼城甩開幾條街嘅關鍵。