曼城輪換細嚼般尼
捨難取易留力聯賽盃
英格蘭足總盃第3圈今晚連場激戰，英超榜首曼城聯賽優勢明顯，照計有餘力爭埋其他盃仔，但考慮到聯賽盃亦已殺入4強，曼城領隊哥迪奧拿隨時捨難取易，派較多年輕球員落場，曼城今場讓兩球唔易啃，面對防守專家般尼未必炒到，建議捧1.7倍中位數3.5球細盤，亦可兼顧埋1.72倍嘅中位數1.5球半場細。
（ViuTV 99台及now 633周六晚11時直播）
曼城快車期間取得3勝1和成績，如果從亞洲盤盤路計，4場波僅首場對般尼茅夫贏盤，可見球隊喺征戰頻繁下，領隊哥迪奧拿戰術上都有所調整，唔想班球員搏到殘晒，畢竟聯賽同歐聯先係曼城今季最大目標，何況下周中亦要踢聯賽盃4強首回合，今場隨時畀班主力抖一抖。
哥帥盃仔習慣用小將
傷兵方面，曼城除加比爾捷西斯及班捷文文迪倦勤外，高柏尼都有微傷或會抖抖，另外大衞施華亦可能因處理家事避戰，預計哥帥會繼聯賽盃8強後再次倚重小將巴謙戴亞斯、艾達拉比奧約及辛真高。
般尼依家排緊第7認真威威，聯賽既無後顧之憂，肯定想喺盃賽揚名立萬，不過般尼班正選喺快車期間踢到殘殘哋，事關般尼係英超輪換次數最少球隊，踢嚟踢去都係嗰班核心成員，睇番快車期間4場冇贏過，但其中3場都屬BIG6球隊，能夠逼和曼聯、最後1分鐘先輸畀利物浦，表現又唔算好差。
般尼硬淨英超細盤王
般尼領隊戴治已表明會輪換，但以佢保守風格肯定唔會成隊換晒，睇番目前般尼傷兵情況，早前已養傷嘅射手基斯活特，左後衞史堤芬禾特，門將湯希頓及中場羅比巴迪均繼續缺陣，不過般尼一向以防守力強見稱，今季聯賽僅失19球，只得英超頭3位失波少過佢哋，亦係全英超開細次數最多球隊，所以今場捧細盤啱數。