車路士無敵主場爆頹廠
4強首回合搶頭彩
英格蘭聯賽盃4強首回合今晚爆發「倫敦打吡」，先由車路士主場迎戰阿仙奴。呢場係兩軍今季第4度交鋒，雖然之前3次法定時間內都係和局收場，不過阿仙奴對上6次造訪史丹福橋球場只得1和5負劣績，而且車路士近排喺地頭出擊往往變身「黃金戰車」，近10仗主場豪取9勝1和，近期頹到極點嘅阿仙奴點頂得順，必捧1.66倍主勝！
（周四凌晨4時開賽）
連同季初社區盾同聯賽兩循環對碰，兩軍今季3次交鋒，法定時間內都打成平手，上仗喺聖誕快車最後1輪賽事交手，阿仙奴都係靠比利連於補時階段入波，先至喺主場2比2辛苦逼和車路士搶番1分。論整體表現，作客嘅車路士明顯發揮更佳，若非西班牙箭頭艾華路莫拉達頻頻失機，「兵工廠」相信連呢1分都保唔住。
阿仙奴剛剛喺足總盃作客對住英冠球隊諾定咸森林，諗住實食冇黐牙，點知「兵工廠」後防嚟個災難級演出，爆冷輸2比4慘遭淘汰，雖則話嗰場領隊雲格派遣副選上陣，但無可否認阿仙奴現時確實處於頹勢。
藍戰士近10主場錄9勝
事實上，阿仙奴喺聖誕新年快車期間嘅4場波，場場都有失球，合共失咗8粒；相比之下，車路士快車4仗除咗對阿仙奴單場失2球之外，其餘3場都保清白之身，防線表現明顯較穩健，更何況「車仔」近6次喺史丹福橋迎戰阿仙奴未輸過，仲贏足5場，擺明格食格，而且「藍戰士」主場出擊分外醒神，近10仗主戰取得9勝1和，單係氣勢已經嚇窒阿仙奴，今晚要先拔頭籌冇難度，1.66倍主勝屬信心之選。