白禮頓水晶宮和味濃
留力護級盃賽唔會搏
英格蘭足總盃第3圈今晚有場「英超對決」，由白禮頓主場迎戰水晶宮，2隊波目前都排英超下半部，今季最大目標當然係護級，足總盃唔會放太多心機。白禮頓今季唔識入波，主場出擊亦樂做「和波大王」，不過水晶宮半力出擊同樣冇贏波把握，今仗不妨直取2.9倍嘅和波。
（now 633周二凌晨3時45分直播）
白禮頓出晒名守強攻弱，近10場賽事有7場都係「食白果」，唔識入波就惟有靠防守搶分，近8仗主場賽事竟然有6次打和，堪稱係「和波大王」。同時，由於白禮頓兵源唔算充足，喺「聖誕新年快車」期間，攻擊主力如格連梅利、柏斯高哥斯等幾乎場場踢足，未必回得切氣，估計即使畀佢哋上陣，都未必交到功課。事實上，白禮頓今季英聯盃第3圈對住英超般尼茅夫，法定時間又係悶和0比0，去到加時先至輸波，今仗似乎都係差唔多嘅劇情。
近3次交鋒2場冇交收
水晶宮自從鶴臣執教之後表現有起色，不過快車期間接連有史葛丹恩同賓捷安2大主將重傷提早收咧，本身又有域咸、祖爾禾特、同馬馬度沙高等長期「十字軍」，人腳緊絀，為免影響護級目標，鶴臣今仗事前張揚收起部分主力，用李青龍、巴卡利沙高、查洛列迪禾特等二線兵上陣，贏波能力自然大受削弱。考慮到2隊近3次交鋒，有2次都係踢成0比0，今仗好大機會都係悶戰和波。