阿仙奴肉緊火燒森林

阿仙奴肉緊火燒森林

近4屆3冠 力爭衞冕

英足盃第3圈，上屆冠軍阿仙奴作客諾定咸森林，阿仙奴領隊雲格因為早前對西布朗一戰，怒插球證甸恩，正式被英足總判罰停賽3場，今場對森林、英聯盃對車路士、英超對般尼茅夫都唔可以親自領軍，幸好對手森林積弱多時，今場依然由看守領隊巴斯帶隊，無力發圍。相信「槍手」們會趁機踢場漂亮勝仗，為雲格出一口氣，阿仙奴讓一球，都要上盤。

（ViuTV 99及Now 633周一凌晨零時）

阿仙奴已14年未嘗英超錦標滋味，今季聯賽奪冠機會亦好渺茫，近年多向本土盃賽埋手，近4屆英足盃更加3度封王，加上今季無緣出戰歐聯，肯定更重視衞冕英足盃。今仗作為衞冕第1擊，加上雲格未能領軍，應會以強陣出擊，避免出現差池。事實上，阿仙奴近5次英足盃作客非英超球隊全勝，上屆英聯盃亦作客大炒諾定咸森林4比0，今場要贏兩球或以上並唔難。

無主森林持續低迷

諾定咸森林上月尾不敵新特蘭之後，領隊禾畢頓被炒，上仗由巴斯暫時領軍，只能同列斯聯打和0比0，已經連續3場冇波入，一日未搵到新帥，恐怕表現都難有改善。值得一提，諾定咸森林喺今屆英聯盃，以1比5慘敗於另一支英超倫敦勁旅車路士腳下，今仗鬥阿仙奴，再次大敗都唔奇。