貝迪斯頹爆畀雷劈
後防缺雙盾 主帥停埋賽
今晚西甲貝迪斯主場對雷加利斯，值得留意，雷加利斯好守得，今季聯賽只係失14球，屬於失波第3少嘅球隊，真係估佢哋唔到，加上貝迪斯主場3連敗，表現頹到爆，更加咬唔入雷加利斯。雷加利斯有得受讓，可以博讓球客勝。
（Now 632周二凌晨4時直播）
雷加利斯自知實力有限，大踢穩守突擊，呢招非常奏效，7場聯賽勝仗之中，有6仗係小勝1比0或2比0，更加曾經守和馬德里體育會0比0。雖然戰術沉悶，但勝在夠實際，非常適合雷加利斯呢種細球會，梗係會繼續沿用。
近4次交手雷加利斯3勝
貝迪斯上仗「打吡戰」作客力挫西維爾，但要留意佢哋近5場主場只有2和3負，包括西班牙盃不敵西乙球隊卡迪斯，名副其實係「主場不利」，加上貝迪斯今仗除咗兩名後防大將費達爾同艾沙文迪停賽外，連主帥史坦恩都要坐波監，面對往績佔優、近4次交手錄3勝嘅雷加利斯，實在冇本錢讓波。
葡超方面，摩里倫斯主場兩連敗，皆因對手係賓菲加同波圖，今仗主場鬥塞圖巴爾，應該可以反彈。另一關，艾斯杜尼近5次主場對波圖，有4次總入球達4球或以上，中位數2.5/3球直取入球大。
（有線155台周二清晨5時直播）