曼聯慢熱篤定開半和
寸王怕輸唔敢亂攻
今晚英超獨腳戲，由「2哥」曼聯主場迎戰史篤城。紅魔主帥莫連奴一向怕輸，而且近期狀態麻麻搞到入局堅慢，近6仗從未半場領先，當中5次開半場和，撞正怒炒曉士後群龍無首、勢必泊大巴嘅史篤城，初段未必咬得入佢哋，半場和值得追多鋪。
（Now 621及LeSports周二凌晨4時直播）
曼聯喺聖誕新年快車期間，4場聯賽僅1勝3和，主帥莫連奴生性怕輸唔敢亂攻，上周英足盃第3圈主場雖以2比0擊敗英冠打比郡，但亦要苦戰至完場前6分鐘才憑連格打破悶局，並由盧卡古入波奠勝，贏波過程絕不輕鬆，如連同快車前在英聯盃8強不敵布里斯托城，曼聯近6仗上半場只得5和1負，入局堅慢，可見面對死守球隊，初段喺大家好氣好力下，擅助攻嘅艾舒利楊格又停賽，攻力點都爭啲，難怪莫帥喺冬季轉會窗想撬阿仙奴王牌阿歷斯山齊士過檔，希望加強鋒力。
史篤城未有主帥勢泊大巴
另一邊廂，史篤城上仗英足盃作客乙組仔高雲地利，竟然輸1比2被踢出局，賽後球會怒炒執教逾4年嘅領隊曉士，佢哋都積極搵緊新帥，但前屈福特教頭科里斯落實留番喺愛斯賓奴，依家轉斟嘅愛爾蘭國家隊主帥奧尼爾，佢又未決定，暫由助教尼迪維斯基出任看守領隊。況且，史篤城近7仗聯賽只得1勝1和5負，排緊尾3，為護級一定泊大巴，紅魔咁慢熱初段難咬得入佢哋，捧半場和好過。