墨城客W飛勁夠贏水手
今日球彩台上演「澳職」雙料娛樂，午飯後打頭陣有中岸水手主場迎戰墨爾本城（有線64及203台周日下午2時直播），繼而有「一哥」FC悉尼作客阿德萊德聯做下午茶點（有線64及203台周日下午4時直播），而我心水喺頭場。論近況，「水手」同「墨城」絕對係一個天一個地 ── 主隊近期屢屢敗陣，客隊就贏波頻頻，今日雖然作客，都有早飛支持。寧買當頭起，都係要博「墨城」上盤！
中岸水手半隊主力缺陣
中岸水手近期狀態認真麻麻，近6場輸咗4場，另外嗰兩場係和波收工。而呢6場嘅表現呢：失球同入波比率，係7個1皮！可想而知，近期攻守都出現幾大問題。人腳上，今日都係擺個天殘地缺陣，後方位置左閘祖舒亞路斯、右翼安祖賀利停賽，左翼干洛皮恩、防中巴馬有傷，另外中場中嘅丹尼爾達斯華、翼鋒布夏基亞亦要代表U-23國家隊披甲，半隊唔見咗，實力起碼打個5折啦。再弊嘅就係，兩隊對碰往績上，水手近3次對墨城全部輸鬼晒，今日縱然有主場都唔慌樂觀得去邊度喇！
水手運滯，相反墨城就幾醒神，近兩場全部贏晒，前鋒羅斯麥哥馬克更包辦晒4個入波，弗到震！由於佢依家力追緊排喺射手榜榜首嘅保保，鬥心一定強。後防亦傳嚟好消息，強力中堅拿洛卡復出，人手調動上更加充裕。墨城雖然依家排積分榜嘅第3位，但為鞏固住前6位置踢季後賽，都要繼續搶分，加上澳職近期正值快車期尾聲，兵源較為豐富嘅墨城始終有着數。半球盤有早飛支持，今日呢3分應該穩陣喇！