車仔搶W大陣仗
變陣強攻李斯特城
周六晚英超烽煙四起，車路士將會主場迎戰李斯特城；車仔近7仗聯賽主場贏晒，對上一仗更以5比0橫掃史篤城，喺史丹福橋球場威到盡。對手「狐狸」李斯特城上仗聯賽3球輕取對手，一班進攻球員盡顯功架，主力前鋒占美華迪傷愈復出，攻力有番咁上下。兩隊以往交手經常駁火，近7次對碰有6次都開3球或以上，今場中位數2.5球嘅入球大抵玩。
（Now 621及LeSports周六晚上11時直播）
1月轉會窗一開，利物浦嘅菲臘比古天奴已經過檔巴塞，而阿仙奴前鋒阿歷斯山齊士盛傳將會加盟曼城，李城嘅馬列斯亦深受各大球會關注。呢位攞過英超最佳球員獎嘅阿爾及利亞中場，實力同才華都毋庸置疑，去年12月喺英超攻入4球弗到漏，加上好拍檔占美華迪賽前及時復出，兩人夾慣夾熟，「狐狸」攻力即刻升呢，有望延續球隊近7場聯賽全開3球或以上嘅走勢。
玻璃從天而降毀干地座駕
車仔今季坐鎮史丹福橋球場表現對辦，尤其聯賽主場已經取得7連勝，前鋒艾華路莫拉達同中場球星夏薩特一樣咁弗，不過球隊日前喺練習場發生罕見意外，據報有一張放喺2樓露天地方嘅玻璃台，台面玻璃竟然被超級強風吹起，由2樓直插下面嘅停車場，咁啱打中干地嘅車位，好在干地當時並唔喺車入面，否則隨時車毀人亡！正所謂大難不死、必有後福，盛傳今季結束後辭職嘅領隊干地，今仗或會重用343較進取嘅陣式，增加進攻強度，務求取得2018年聯賽首勝。翻查往績，兩隊過去7次碰頭6次都開3球或以上，今場有望上演入球騷，中位數2.5球嘅大盤值捧。