拜仁訪凶地難獲利
經過4周歇冬期，德甲今晚重開，首仗即上演前列大戰，4哥利華古遜主場挑戰榜首拜仁慕尼黑，拜仁無疑質高一皮，不過近年到訪利華嘅拜耳球場都唔識入波，加上受傷兵問題困擾，今場作客讓到半一太多，黑柴撐1.82倍嘅利華古遜下盤。
（有線61、201台、Now 670及Fox Sports Play周六凌晨3時30分直播）
拜仁自老帥軒歷基斯出山重掌帥印後，喺短短兩個月時間內，由原本落後榜首多蒙特5分，大幅躍進到歇冬前喺聯賽榜遙遙領先次席史浩克11分，球隊迅即重返正軌，軒帥功力盡顯。不過，基於今年歇冬期縮短，佢哋拉隊去多哈集訓難免舟車勞頓，而且面對傷兵問題困擾，門神紐亞同中場大腦堤亞高艾簡達拿仍然長抖緊，射手羅拔利雲度夫斯基亦未能趕及傷愈披甲，陣中另外3名主力，包括中堅曉姆斯、謝路美保定同超新星甘美治，喺歇冬期大部分時間都養傷，直至最後一課至復操，狀態肯定未足，球隊歇冬期簽咗賀芬咸前鋒辛度華拿做利雲度夫斯基副車，今晚預期會有機會落場，但同舊將配合需時，今場作客遇強敵面臨嚴峻考驗。
作客利華古遜450分鐘冇波入
利華古遜目前位列第4，主要原因係今季出閘脫腳，頭5場聯賽只得4分，不過新帥靴歷治經過適應期後，球隊演出同戰績迅即攀升，之後12場聯賽6勝6和保持不敗，主場開咧至今4勝4和未輸過。再睇往績，佢哋嘅拜耳球場近年一直係拜仁最怕到訪嘅凶地，連同德國盃，拜仁近10次作客利華喺法定時間內只嘗1勝，而且已經有超過4場比賽，連同加時共450分鐘未試過喺呢個球場入波，上次作客利華入波已經要追溯到2013年，可見利華主場打拜仁甚有心得，何況主隊今仗可以夫添出擊，靴歷治面對強敵都聲言要攞好成績，為爭下屆歐聯入場券打好基礎，足見佢有充足信心再喺拜仁身上搶分。