另一場西盃8強，周四凌晨馬德里體育會喺主場硬撼西維爾。今季表現飄忽嘅西維爾最近搵嚟新帥蒙迪拿扭轉球隊頹勢，不過呢位教頭上任後近兩場聯賽輸晒，睇嚟一時三刻想翻生都幾難。相反馬體會獲迪亞高哥斯達回巢攻力大增，而且近4次主場面對西維爾有3次都贏對手2球或以上，呢場絕對可以再借主場之利輕取對手，讓球主勝捧得過。
（周四凌晨2時開賽）
西維爾頹勢未止
繼喺同市打吡3比5畀貝迪斯羞辱之後，上仗西維爾仲輸畀聯賽下游球隊艾拉維斯，如果話早前炒咗受癌病困擾嘅主帥貝利素係想一止頹勢情有可原，新帥蒙迪拿上任後兩仗聯賽1分都拿唔到，就足以引起球迷公憤，早前就有西維爾擁躉走入訓練場同球員對峙，場面十分尷尬。球隊近5仗客戰只取1勝1和3負戰績低迷，球迷想洩憤都在所難免，嗰勢咁頹仲要面對強敵，睇怕都難有作為。
各項賽事近6仗主場全勝嘅馬體會，舊將迪亞高哥斯達喺1月轉會窗終於「愛回家」，佢上陣3場就攻入2球表現對辦，加上有前西維爾中場韋圖倒戈相向，馬體會前線攻力隨時高幾瓣，呢場有力大勝輕取對手，讓球主勝唔好錯。