巴塞趁機輪換焗住獻細
對細佬愛奴例客氣
西班牙盃8強首回合上演「加泰羅尼亞打吡」，愛斯賓奴主場對巴塞隆拿，雖然話係打吡戰，但巴塞作客對住「細佬」一向好客氣，往往見好即收，近7次作客愛斯賓奴，有6次總入球係2球或以下，而且首回合未必去盡，今仗大細中位數開到3/3.5球，1.7倍入球細筍爆。
（周四凌晨4時開賽）
由於西班牙盃16強及8強賽事集中喺1月舉行（見附表），衞冕嘅巴塞隆拿近期頻頻一周雙賽，球員體力負荷非常大，特別係上場聯賽作客陷入苦戰，落後2球劣勢下，幾經辛苦先至反勝皇家蘇斯達，耗力甚多。教練華爾維迪深明需要懂得留放，先至有力問鼎各項錦標，踢本土盃仔，未必去得太盡，避免美斯等球星踢到殘，今場輪換陣容亦唔出奇。更加不幸係貴價新兵奧士文尼迪比利又受傷，需要抖1個月，菲臘比古天奴亦有傷在身，不宜高估。
愛斯賓奴主場打吡戰旺細
另一邊廂，愛斯賓奴實力有限，攻力尤其差，今季19場聯賽僅入16球，想爆冷贏「地上最強」機會好微。不過佢哋自己地頭出擊，鬥心有保證，就算贏唔到，亦唔想輸得太肉酸，近7次主場鬥巴塞隆拿，錄得2和5負，其中3次輸0比2、1次輸0比1，兩次和波分別打成1比1及0比0，最大敗仗只係輸0比3。愛斯賓奴抱住輸少當贏嘅心態，好大機會「泊大巴」死守，中位數3/3.5球，入球細抵玩。