車仔爆偈撐唔諾手
體能到極限冇人識入波
英格蘭足總盃一直被稱為「爆冷溫床」，尤其英超豪門近年對盃賽重視程度大減，更加造就唔少意外賽果出現。英足盃第3圈就有阿仙奴畀森林踢出局，車路士、李斯特城、韋斯咸、史雲斯、般尼茅夫等英超隊亦被低組別球隊逼到要重賽，疲兵車路士今晚主場迎戰諾域治要讓球球半、兩球，隨時再食悶棍，捧1.86倍嘅諾域治下盤！
（ViuTV 99、Now 633周四凌晨3時45分直播）
足總盃7屆盟主車路士近期狀態大跌，連續4場比賽都係打和，最慘係2大進攻核心夏薩特同艾華路莫拉達都跌Watt，導致近3場比賽都冇波入。上仗聯賽0比0悶和李斯特城，夏薩特同法比加斯2大發電機都被提早換走，領隊干地承認2人體能已經去到極限，今仗好可能會掛免戰牌，嚴重削弱車仔進攻創造力。
雖然新加盟嘅英格蘭中場巴克里今仗會為車路士處子登場，但佢重傷初愈狀態肯定不足，而且首席射手艾華路莫拉達已經連續5仗食白果，後備箭頭巴舒亞伊對上一次入波更加係上年10月嘅事，「藍戰士」依家冇人識入波，又點樣可以贏波呢？
諾域治德系兵團好守得
作客嘅諾域治只排英冠中游，但呢支擁有多名德國系戰將嘅球隊近期狀態甚佳，對上5場比賽3勝2和保持不敗佳績，呢5場波更加有4場保持不失球，以添姆高路斯同基斯杜夫森馬文同堤迪為首嘅防線相當穩陣，有力抵抗「冇牙老虎」車路士進襲，「下盤」值得支持。