獅吼光輝鬥轟做大騷
兩弱交鋒不設防
今日澳職獨腳戲，布里斯班獅吼主場迎戰珀斯光輝。獅吼以老將為骨幹，喺頻密賽程之下，體能自然頂唔順，表現每況愈下，近6場聯賽輸5場。對手珀斯光輝亦唔好得去邊，近4場輸晒，合共失14球，猶如不設防。既然雙方防守都差，最好揀中位數2.5球嘅入球大。
（有線64、203台及無綫myTV SUPER 303周四下午4時50分直播）
布里斯班獅吼今季簽入意大利老牌前鋒馬卡朗尼，雖然佢已年屆38歲，但其卡士超班，今季聯賽已有7球進帳，鋒線力量尚算不俗。不過，獅吼陣中仲有賓卡法拿、湯馬士基斯甸臣等主力年過30，面對頻密賽程，體力難免吃不消，往往導致回防慢，被對手有機可乘。此外，獅吼下周中要應付亞冠盃外圍賽，進一步令班老將疲於奔命。
近6對戰炮製26球
值得一提，獅吼今季主場防守力比作客更差，近4場聯賽主場全敗，合共失9球，歸根究柢，係因為獅吼主場出擊往往側重進攻，令防線飽受壓力，以致上述4仗有3次總入球達3球或以上，已成為慣性風格，恐怕短期內難以改變。另一邊廂，珀斯光輝近4場失14球，包括作客吞FC悉尼6蛋，防線猶如豆腐一樣。考慮到光輝同獅吼近6次常規賽交鋒，合共炮製26個入球，總入球全開3球或以上，預計兩軍會再演入球騷，一於向中位數2.5球嘅入球大埋手。