墨爾本勝利打晒悉
西流莫財殘陣難捱
澳職經過上星期嘅快車之後，今周恢復番正常嘅一周一輪秩序。今日下午就有聯賽榜第6位嘅西悉尼流浪者，主場迎戰「4哥」墨爾本勝利。「西流」近況雖然唔曳，已經保持4戰不敗，但「勝利」嘅搶分欲望亦好強烈，加上為阻止「西流」從後殺上就更要頂住，以波論波都係撐墨爾本勝利！
（有線64及203台周五下午4時50分直播）
「西流」自從教頭甘巴爾上任後愈戰愈勇，近4場錄得不敗佳績，不過當中只有1場能保持不失，後防明顯唔夠穩陣。佢哋今仗仲有後防班頓咸美爾、干夫韋迪同中場核心艾華施祖度缺陣，未能以最佳人腳應戰。「西流」重有一個問題就係今季有啲「莫財Feel」，今個轉會窗搵唔到啲有分量嘅球員幫手，爭取更高排名參戰季後賽。
勝利近6次到訪贏4場
墨爾本勝利上場終於止跌回升，雖然贏珀斯光輝有啲驚險，但睇番全場過程，「勝利」進攻叫做流暢，亦睇到隊波有番鬥志，梗係想食住個勢發力爭取更高排名。「勝利」進攻人腳依然保持強勢，右翼巴巴路西斯更係入波又得助攻又得，今仗對住殘陣出擊嘅「西流」防線，隨時又「數番十胡」，另外一眾攻擊好手貝利沙、利萊佐治同杜羅奧斯都可以披甲，絕對值得睇高一線，再睇埋對賽往績，墨爾本勝利近6次作客「西流」贏咗4次，甚有格食格味道。所以今日一係唔信，要信一定信墨爾本勝利！