華倫勢猛「拉」唔住
前鋒撻着打落水狗
西甲激戰連場，等我阿King醒番啲貼士畀大家，等大家過番個盆滿缽滿嘅周末。華倫西亞近期表現回勇，尤其前場多位攻擊手都狀態不俗，作客近5仗聯賽未贏過嘅拉斯彭馬斯，直取客勝。另外再捧愛斯賓奴細同馬德里體育會大，3串1有5.3倍咁好分，唔好錯過。
作客挑戰拉斯彭馬斯嘅華倫西亞，今季多位進攻球員都表現出色，好似前鋒洛迪高摩連奴同干卡路古亞迪斯，近兩仗都齊齊有波入，另外1月轉會窗加盟嘅阿根廷前鋒韋圖表現亦都對辦，首次上陣就喺西盃上演帽子戲法幫球隊贏4比0，嗰場對手仲啱啱好係拉斯彭馬斯，呢場有望照辦煮碗。反觀拉斯彭馬斯換帥後表現未見起色，近5仗聯賽只得1和4負慘淡戰績，呢場根本冇力搶分，捧客勝好過。
（Now 632周日凌晨3時45分直播）
串愛斯賓奴細馬體會大
至於主場迎戰西維爾嘅愛斯賓奴，近7仗聯賽坐鎮主場都開2球或以下，有力頂住西維爾攻勢，中位數2.5球入球細值博。
（Viu TV 96及Now 632周六晚8時直播）
最後，馬德里體育會有前鋒迪亞高哥斯達坐完波監復出，面對上仗大勝對手6球嘅基羅納，有力對攻，中位數2.5球入球大捧得過。
（Now 632周六晚11時15分直播）