曼城碌「卡」歎私房菜
英超「一哥」曼城主場出戰紐卡素，雖然曼城剛於上仗作客被利物浦打破今季聯賽不敗之身，但球隊本身實力仍然強橫，相信可以迅速復原。特別係曼城近4次聯賽主場鬥紐卡素，都大勝4球或以上，今仗遇上呢支「私房菜」，正好爭取贏番1場漂亮勝仗，重振士氣，曼城讓2.5/3球，都要上盤。
（Now 621及LeSports HK周日凌晨1時30分直播）
曼城上仗表現並唔算差，只因為對手利物浦有超水準演出，最終僅以3比4落敗，算情有可原。曼城今場返到自己地頭比賽，相信唔會再甩拖，因為「藍月亮」喺各項賽事，近16次主場出擊，獲得15勝1和，其中近9仗主場全勝，包括贏阿仙奴3比1，大勝熱刺4比1，要大炒紐卡素，並唔困難。
紐卡素訪曼巿常大敗
至於第15位嘅紐卡素雖然作客2連勝，但對手只係中下游球隊韋斯咸同史篤城，實在唔可以同曼城相提並論。事實上，紐卡素今季作客前列勁旅曼聯、車路士、阿仙奴，都輸波而回，其中作客另1支曼徹斯特球隊曼聯，就慘敗1比4。加上之前4次聯賽作客曼城，都輸4球或以上，曼市已成為紐卡素嘅「凶地」，今仗真係凶多吉少。