曼聯醒晒 搵般尼報仇
重燃爭標希望搶得就搶
隨着上周英超榜首曼城被破不敗之身，落後12分嘅曼聯重燃番些少希望，不過最緊要都係自己爭氣先，事關曼聯早前快車期真係冇場好波，係近幾場贏波先重拾信心，今晚作客狀態下滑嘅般尼，曼聯讓半球、一球，樂比睇好上盤。
（Now 621及LeSports周六晚11時直播）
般尼季初被視為降班第3熱門，賠率僅冷過兩支升班馬，但估唔到依家卻能夠排第7位，除BIG6之外佢哋威晒，不過樂比覺得踏入季中，般尼要好似上半季咁勇猛唔容易。
首先佢哋人腳所限，具質素嘅球員唔多，係英超陣容變動最少球隊，本來默契好亦係佢哋嘅優勢，但上月踏入快車期後，球員開始有疲態，連足總盃都冇乜點輪換，搞到球隊成績大倒退，近6仗2和4負，開始響起警號。
般尼唔上唔落欠爭勝心
其次係球員飢渴感冇之前咁強，講真季中去到呢啲位，降班威脅又唔大，爭歐洲賽席位又唔輪到佢哋，球員鬥志自然冇季初咁旺盛，最重要係唔少主力好似達高斯基、艾菲特都成為其他球會挖角對象，依家距離冬季轉會窗關閉仲有個幾星期，部分球員難免心事重重，自然難一心一意爭取好成績。
拆禮物日領過嘢唔再大意
反觀曼聯經過12月多場失利後，踏入2018年連贏3場，睇嚟莫連奴已成功平定軍心，據講佢已同球會達成續約協議，另外阿歷斯山齊士加盟嘅傳聞亦甚囂塵上，球隊目前冇乜傷兵，僅伊巴謙莫域同艾歷拜利倦勤，連格近5仗入4球腳風甚順，球會各方面消息都好正面。
兩隊去年拆禮物日先交過手，當時曼聯落後兩球劣勢下逼和對手，吸收過上次教訓，莫連奴應該唔會再大意，曼聯近期賽期較疏，下場比賽要到下周末先進行，仲要係足總盃對低組別球會伊奧維，正係好機會畀球員調整，今場可以毫無保留全取3分。