PSG殺「迪」係最佳進攻教材
筆者對足球嗰團火仍然燒得熾烈，無論係普通睇波抑或做即場評述，都會不斷用腦思考研究，仔細分析比賽各項細節，甚至可成為教練指導球員時嘅教材。
好似周中凌晨法甲加開快車，我一晚評述2場波，先是里昂作客對甘岡，之後再講埋尾場巴黎聖日耳門（ＰＳＧ）主場對迪安，自己唱獨腳戲，講足大約4個鐘，若非對足球有無比熱情，漫漫長夜都幾捱，其中ＰＳＧ對迪安嗰場波，更給了我很多作為領隊嘅教材。呢場波尼馬食出大四喜，迪馬利亞梅開二度，基利安麥巴比及卡雲尼各建一功，後者以156球追平伊巴謙莫域並列ＰＳＧ史上入球王，最終ＰＳＧ大屠殺狂勝8比0。
各類進攻板斧都齊備
呢8個入波中，既有顯示個人技術根底嘅一面，例如迪馬利亞先開紀錄嘅妙射及尼馬操刀嘅靚罰球，亦有落點妙絕造就卡雲尼頭槌破網嘅整體配合，乜嘢進攻板斧都齊備，我已將呢場所有入波嘅片段儲存起，作為日後教波時向球員逐一分析嘅教材。唯一美中不足嘅，係尼馬為咗獨建四功，未有將完場前嘅12碼，讓畀只差1球便可獨佔ＰＳＧ入球王嘅卡雲尼操刀，雖然佢辯稱自己係主帥艾美利指定嘅極刑劊子手，但始終卡雲尼幫球隊立下不少功勞，除咗入波之外，仲經常不惜氣力喺前場做壓迫，以及拉邊為隊友製造入楔空間，咁無私為集體服務嘅30歲星級前鋒，值得做個順水人情，讓畀佢操刀12碼破紀錄。