國米今晚主場迎戰羅馬，「藍黑兵團」今季本來開局唔錯，但上年12月後極速滑落，所有賽事近7場不勝，如果今晚輸埋，隨時前4位都不保。好在有兩周休戰期畀國米叉電，加上倒戈主帥史巴列堤熟晒羅馬路數，一於捧2.15倍主勝！
（無綫myTV SUPER 302周一凌晨3時45分直播）
國米近5場聯賽3和2負，毫無疑問陷低潮，但當中對前列勁敵如祖雲達斯及拉素都唔使輸，情況唔算太壞。教練史巴列堤執教羅馬多年，熟晒舊主條路，首循環就帶領國米作客贏羅馬3比1。正所謂唔熟唔食，史帥今晚必趁機會打翻身戰。
羅馬軍心散渙冇運行
羅馬今季「欺善怕惡」，鬥意甲前3位球隊拿玻里、祖雲達斯同國際米蘭都輸波，賽前盛傳多位主力如尼恩高蘭、史杜特文同迪斯高等都有離心，軍心唔慌好，作客聖西路睇怕冇運行。