熱刺強勢狙擊聖人
周一凌晨英超獨腳戲，熱刺作客聖馬利球場鬥修咸頓。熱刺射手哈利卡尼今季繼續保持超高嘅入球效率，近兩仗為球隊上陣就連續兩次梅開二度，而且熱刺上個月先啱啱以5比2大挫修咸頓，嗰場哈利卡尼就個人連中三元，勢不可當，加上熱刺其餘進攻球員都夠弗，修咸頓齋嘜哈利卡尼都頭大，根本冇力阻止熱刺破門，呢場難逃一敗，肯定捧客勝。
（Now 621及LeSports周一凌晨零時直播）
近2季英超都以頭3名完成賽季嘅熱刺，季初曾因為唔適應新主場等客觀因素影響，未能保持喺聯賽前3，可見要維持高水準表現捍衞佢哋英超Big6嘅地位，絕對唔係易事。不過球隊已經明顯擺脫主場不勝嘅魔咒，成為挑戰聯賽前5嘅有力競爭者，而且喺歐聯戰線繼續高歌猛進，可見熱刺走勢絕對唔曳。加上班波表現絕對抵讚，尤其當家射手哈利卡尼一直維持超順腳風，以20球高踞聯賽射手榜榜首，嚟緊佢只要再入多2球，就會成為熱刺史上第一位為球隊喺英超攻入100球嘅球員。上個月哈利卡尼面對修咸頓已經試過大演帽子戲法，仲破埋由名宿舒利亞保持嘅年度英超入球紀錄，今晚再會「聖人」入波絕對有心得，睇好佢再為球隊取勝。
修咸頓防線兵源短缺
相反修咸頓喺領隊比歷堅奴帶領下表現令人失望，現時只離降班區1分，聯賽排名倒數第4，最弊係近況麻麻，踏入2018年英超未贏過波之餘，主力後衞華基爾雲迪積克仲要畀利物浦撬走，大大削弱後防實力，另一位後衞吉田麻也又有傷上陣成疑，防線兵源短缺，只會益咗熱刺一班弗爆進攻好手，「聖人」隨時輸多幾粒，客勝走唔甩。