每逢鍊車特別醒神
今晚英格蘭聯賽盃4強次回合嘅「倫敦打吡」，輪到阿仙奴喺主場迎戰車路士。「兵工廠」首回合作客守和車仔0比0，表現唔失禮，事實上今季表現飄忽嘅阿仙奴，每逢對住車仔都格外醒神，今季4度交手都能保持不敗，今場阿仙奴有主場之利戰意滿分絕對唔講得笑，平手盤仲要有2.03倍高水，必撐主隊無疑！
（周四凌晨4時開賽）
阿仙奴上季痛失前4嘅歐聯入場券，今季喺英超表現亦時好時壞，同前4球隊仲有段距離，大有可能再次無緣下屆歐聯，早前喺足總盃畀英冠兵諾定咸森林淘汰，令老帥雲格面對前所未有嘅壓力。不過有危就有機，阿仙奴不斷傳來負面消息、加上王牌阿歷斯山齊士離隊轉投曼聯，上仗聯賽反而以4比1清脆贏到水晶宮，好似要話畀大家知佢哋仲未放棄，士氣同狀態未必如想像中咁曳。
今季4交手 兵工廠不敗
事實上計埋聯賽同盃賽，阿仙奴今季同車路士已交手4次，法定時間都係和波收場，包括英聯盃4強首回合作客零封對手，嗰場所見眾「槍手」毫不錫身，喺前場就開始緊迫對手，搞到車仔難以製造威脅，今晚返主場有埋球迷助陣，肯定更搏命。
莫拉達頻食白果失信心
車路士近期出現低潮，早前各項賽事5連和贏唔到，係上輪聯賽大炒白禮頓似番啲樣，不過射手艾華路莫拉達呢6場全部食白果，連番失機明顯陷信心危機，加上靈魂人物夏薩特遲遲唔肯同球會續約，點都會影響軍心，今仗睇怕難以攻陷阿仙奴嘅銅牆鐵壁，平手盤梗係向主隊埋手。