1球在手次回合拉布
英格蘭聯賽盃4強次回合今晚再演「雙城記」，英冠前列分子布里斯托城主場迎戰英超「1哥」曼城。首回合曼城靠阿古路補時絕殺，幾經艱苦先至反勝2比1，證明曾淘汰曼聯等4支英超兵嘅布里斯托城唔易砌，「藍月亮」半力出擊或以保住勝局為目標，3.5球入球細值博。
（周三凌晨3時45分開賽）
布里斯托城遇強愈強
布里斯托城今屆英聯盃表現勇猛，連挫屈福特、史篤城、水晶宮同曼聯4支英超球隊，對上嗰3圈更加只失2球，即使4強首回合作客曼城亦能踢成均勢，今仗主場出擊，曼城要入佢哋波都唔容易呀！
雖然曼城啱啱喺英超反彈，主場以3比1擊敗紐卡素，而王牌阿古路仲表演埋「帽子戲法」，但唔好忘記，曼城今季要應付多條戰線，故此領隊哥迪奧拿習慣喺英聯盃半力出擊，連阿古路首回合亦只係後備入替，預計今仗亦唔會擔正，加上「藍月亮」今屆4仗英聯盃只入5球，4仗總入球都係3球或以下，而且曼城只要保住勝局就入決賽，作客隨時玩拉布，中位數3.5球嘅細盤乃不二之選。