周中英超最hit話題，梗係離心日久嘅阿仙奴王牌阿歷斯山齊士，終於得償所願轉投曼聯，而紅魔亦用米希達利恩交換到阿仙奴。呢種球員互換東家嘅交易，喺美國嘅NBA及美職棒球大聯盟亦司空見慣，有時甚至會出現用3至4個球員交換1名球星，某球隊既可獲得心頭好，而用唔着嘅球員也有機會在新東家發揮所長，更可減少金錢損失（當然部分交換係需要補錢），絕對係雙贏局面。
曼聯要即食 技術流啱入「廠」
今次山神/米希對換，最值得一讚嘅，係兩軍主帥兼冤家莫連奴及雲格放下成見，以球隊利益為大前提，同死敵進行交易。雖然曼聯喺聯賽要追趕曼城嘅機會都幾渺茫，但仲有歐聯可爭，需知道「寸王」帶領波圖及國際米蘭登上歐洲之巔，2次喺冬季轉會窗補入卡路士阿爾拔圖及彭迪夫，都成為最終登頂嘅關鍵，由於陣中箭頭盧卡古只識欺善怕惡，對親強隊都玩隱形，伊巴謙莫域又未好番，如今簽入可出戰歐聯嘅「即食型」山神乃及時雨，佢喺前場積極逼搶及趁機入楔，久攻不下仲有一招遠程炮，啱晒「寸王」胃口；另一邊廂，米希達利恩擅於用波及組織進攻，與「技術流」嘅阿仙奴不謀而合，就算喺曼聯發展未如理想，亦不能否定呢位「阿美尼亞施丹」嘅實力，轉換環境隨時獲得重生。
至於今晚英足盃第4圈，彼德堡主場對李斯特城、米杜士堡主場對白禮頓、侯城主場對諾定咸森林，筆者認為李斯特城、白禮頓及諾定咸森林有力反客為主，贏波晉級。
金句：山神/米希對換係雙贏交易，亦係買賣球員的正面藍本