卡雲尼爭入波創歷史
法甲「一哥」巴黎聖日耳門上輪聯賽輸畀里昂，雖然喺榜首仍然有8分優勢，不過為免夜長夢多，今晚主場迎戰蒙彼利埃肯定想贏番漂亮一仗，尤其射手卡雲尼仲差1球就可以創球會史上入波最多紀錄，梗係想趁早實現，主場出擊火力全開，大細中位數3.5球嘅大盤話咁易就開出啦！
（無綫myTV SUPER 303及Now 714周日凌晨零時直播）
巴黎聖日耳門依家雖然有兩位天價球星尼馬同基利安麥巴比受傷，但係大家都冇乜理由懷疑呢支班霸嘅陣容實力，由迪馬利亞、達斯拿、柏斯托尼等球星輔助卡雲尼進攻，點計都係世界級組合。唔好忘記，烏拉圭射手卡雲尼只要再入多1球，就可以157球成為球會史上入波最多球員，今仗趁尼馬缺陣冇人爭食，當然要全力數胡啦！
蒙彼利埃防線穿窿
巴黎聖日耳門啱啱喺足總盃4比2大破甘岡，睇番佢哋近8仗主場賽事，有7仗總入球達到4球或以上，擺明主場出擊唔會留力。作客嘅蒙彼利埃近7場比賽不敗狀態雖然唔錯，不過佢哋入波多之餘失球都唔少，周中足總盃就以4比3險勝羅連安特，今仗造訪巴黎對住火力十足嘅聖日耳門，睇怕又係大手交易。