阿甲歇暑期完後重開，阿King收到好料介紹畀大家。小保加剛獲舊將泰維斯回歸，呢位「野獸」重返母會自然望冧盡家鄉粉絲，聽朝坐鎮糖果盒球場面對中游分子高隆，小保加有望取得新年開門紅，主勝冇走雞。
（無綫myTV SUPER 303周日早上8時30分直播）
泰維斯效力中超FC上海（上海申花）時表現畀球迷詬病，不過阿King好相信佢重返母會小保加會係另一回事，落場態度同「搵銀」定必截然不同，尤其主力前鋒賓尼迪圖長抖，泰維斯孭起前線攻堅重任實搏殺，加上球隊近9次主場面對高隆，獲8勝1和嘅絕對優勢，主勝屬重心之選。
串沙士菲紐維爾舊生雙贏
其餘兩場同時間開波嘅阿甲，紐維爾舊生主場對包尾嘅沙蘭迪兵工廠。紐維爾舊生暫時未入局，不過面對包尾嘅兵工廠要贏唔難；最後沙士菲作客挑戰防衛者，沙士菲有前曼聯後衞軒斯接掌教鞭，搵嚟強援莫路沙拉迪實力大增，聯賽下半程有望脫離降班區，簡單要客勝。
（周日凌晨4時開賽）