鋒線啞火難炒基爾禾
意甲6連冠嘅祖雲達斯今晚聯賽作客基爾禾，祖記勢頭唔錯，聯賽5連勝僅落後榜首拿玻里1分，正等待機會反超前，今仗遇弱隊料全取3分應該冇問題。不過，祖雲達斯鋒線死火，希古恩陷入球荒，加上另一射手保羅戴巴拿養傷，今仗好可能又小勝收場，客W賠率太熱冇肉食，可揀1.95倍嘅入球細。
（無綫myTV SUPER 302周日凌晨3時45分直播）
祖雲達斯一向靠阿根廷孖寶希古恩同保羅戴巴拿數胡，兩人今季已為球隊轟入23個聯賽入球，佔球隊近一半入波數字。不過呢對阿根廷孖寶近期好黑仔，希古恩已經6場聯賽冇波入，腳風極之唔順，而保羅戴巴拿因傷關係仲要繼續抖，令球隊入球重任幾乎落喺克羅地亞前鋒文迪蘇傑身上，只可惜佢今季狀態亦走樣，令「斑馬兵團」攻力大打折扣，所以祖記近兩仗即使對住聯賽下游球隊卡利亞里、熱拿亞，但都同樣只係險勝1比0，捧Ｗ的話唔太穩陣。
基爾禾7場聯賽未贏過
雖然祖雲達斯入波能力下降，但防守方面仍然好穩陣，球隊近8場聯賽只失1球，真係烏蠅都好難飛得入佢哋大門。更何況基爾禾近7場聯賽未贏過，當中更曾經畀聯賽降班膽賓尼雲圖以1比0擊敗，士氣直插谷底，今場實在無能力威脅祖雲達斯防線。作客嘅「斑馬兵團」今仗再煲「魚生粥」並唔出奇，問題係客勝只得1.26倍實在捧唔落手，入球細有1.95反而更具捧場價值。