高質新兵表現對辦
今晚西甲爆發前列大戰，由「3哥」華倫西亞主場迎戰第4位嘅皇家馬德里。「蝙蝠軍團」開咧勢如破竹，曾錄得8連勝佳績，近期狀態雖稍為回落，但1月轉會窗引入唔少高質對辦新兵；客軍「銀河艦隊」今季聯賽成績大倒退，加上近年作客華倫往績曳，今仗讓波盞搞，必捧2.25倍讓球主勝！
（Now 632周六晚11時15分直播）
華倫今季演出回復昔日光彩，喺1月轉會窗更積極加強兵力，包括借得馬體會前鋒韋圖同簽入阿仙奴防中高基連，令中前場實力更完整，其中韋圖加盟後首騷就大演帽子戲法，表現對辦。「蝙蝠軍團」今季主場表現特醒，只曾喺打吡戰以1球僅負維拉利爾，其餘賽事保持不敗，包括和過馬德里體育會同巴塞隆拿等勁旅。
睇番積分榜，華倫現時以40分排名第3，要追榜首巴塞可能難啲，不過同次席嘅馬體會只差3分，比第4嘅皇馬踢多場但領先5分，搶分壓力點睇都肯定係皇馬更大，再者華倫過往喺主場對親「銀河艦隊」都特別落力，近3次取得2勝1和，往績絕對信得過。
皇馬近4仗聯賽客戰不勝
現時落後「1哥」巴塞隆拿足足19分嘅皇馬，衞冕可以話名存實亡，皆因球隊表現太過飄忽，季初主場頻頻失分後，近期輪到作客都「啞火」，聯賽近4場客戰全部不勝，周中仲喺西班牙盃畀雷加利斯淘汰出局，士氣同狀態都跌到谷底，主帥施丹亦聞到魷魚香，今時今日嘅皇馬面對主場氣勢咁勁嘅華倫，捧番讓球主勝好過。