紅軍讓得辣有暗湧
今個周末英超暫停，改為上演英格蘭足總盃第4圈，玩呢項盃賽，樂比最重視就係球隊嘅心態，其次都係心態同埋心態，畢竟今時今日唔少球隊視足總盃為雞肋，利物浦自高普接手後，近兩屆英足盃都係呢圈出局，今晚主場對西布朗，利物浦讓球半、兩球絕對有暗湧，樂比撐下盤。
（Now 633及Viu TV 99周日凌晨3時45分直播）
利物浦過往曾7奪足總盃，可惜近年無甚佳作，對上一次捧盃已經係12年前，其實紅軍近兩屆已經好有籤運，但對牌面低嘅對手，依然吃盡苦頭，例如上屆就曾被英甲普利茅夫逼和搞到要重賽，晉級後再被英冠球隊狼隊淘汰，畢竟高普嚟咗英格蘭冇耐，對呢項歷史悠久嘅盃賽冇任何感情包袱，一定係以聯賽及歐聯行先。
雖然利物浦上圈以2比1淘汰愛華頓，排出人腳係唔錯，但嗰場話晒係打吡戰，肯定唔想輸先。不過嚟到依家情況又有啲唔同，因為目前聯賽形勢相當緊湊，排第4嘅利物浦要爭下屆歐聯席位必須加把勁，尤其係下周中英超將會開快車，之後利物浦又要對前四競爭對手熱刺，加埋歐聯仲有兩個幾星期就殺到埋身，預期高普今仗排陣或會留有一手。
近5交手利物浦全部輸盤
紅軍上仗英超以0比1爆冷不敵包尾嘅史雲斯，戰果令人相當意外，正所謂牽一髮動全身，菲臘比古天奴離隊或多或少都有影響。睇番高普嚟到利物浦之後，對親西布朗都諸事不順，5次交手僅得2勝3和，如果計盤路係全部輸晒，以兩隊實力同排名計確實奇怪。
西布朗足總盃例出強陣
至於西布朗目前排尾2，護級形勢確實係險峻，不過佢哋同排第10嘅屈福特其實都係相差6分，情況又唔算好絕望，最重要係領隊柏杜係一個傳統英式領隊，首先唔鍾意大幅度輪換，其次佢亦希望球隊可贏波重建信心，好似上圈淘汰埃克塞特，西布朗亦強陣出擊，佢哋近3仗2勝1和狀態回勇，柏杜絕對唔想打斷呢個勢頭，以呢班波爛打嘅風格，今場相信會令紅軍陷於苦戰。