萊比錫搶踢歐聯啃漢堡
直播賽事由RB萊比錫主場迎戰漢堡，喺本輪展開前，利華古遜、史浩克、萊比錫同慕遜加柏同得31分排2至5名，緊隨其後嘅多蒙特同法蘭克福都有30分，唔計已拋離群雄嘅拜仁，前列歐聯席位真係打崩頭，執筆時未知今日凌晨法蘭克福對慕遜加柏賽果，但喺呢個時候，2至7名呢6隊波攞嘅每1分都至關重要，萊比錫下季想繼續征戰歐聯，主場遇排尾二嘅漢堡當然不容有失，黑柴相信佢哋可以憑質素、主場之利同超強戰意取得令人信服勝仗，「讓球盤」RB萊比錫讓1球，推介1.83倍上盤。
萊比錫上輪作客弗賴堡，喺科斯貝治同拿比基達兩大中場發電機缺陣下，全場遭搶逼踢得好唔暢順，下半場雖然由王牌射手迪姆華拿先開紀錄，但末段竟然畀拚勁十足嘅弗賴堡反勝，所失兩球都係死球，防線精神唔集中係主因，輸完呢場波成隊畀教練夏辛侯迪省到立立令，今場兩大發電機仍然缺陣，不過萊比錫重返主場必定打醒精神，每人走多步，尾二嘅漢堡好難偷雞。
漢堡質態差換帥都冇計
漢堡上輪喺榜尾大戰主場輸畀包尾嘅科隆，搞到教練基斯度被炒，會方搵嚟昔日「魔鬼教練」馬加夫嘅門生賀拿巴治接任教鞭，不過漢堡始終人腳實力所限，好多位置都唔平均，雖然上手教練基斯度喺調兵遣將方面唔叻，但鼓舞士氣同提拔新人已經做得好足，賀拿巴治嘅辣操，喺上任短短4至5日好難即時幫到球隊，漢堡上輪主場對科隆，就算落後成個下半場都冇一腳似樣射門，實力同狀態都極曳，今晚面對矢志發憤嘅萊比錫好難翻身。