夢想招牌掠群雄
德甲踢到第55屆，班霸拜仁慕尼黑已經贏得26屆冠軍，接近一半，遠遠拋離次席、只贏過5次冠軍嘅慕遜加柏同多蒙特，而且王朝盛世愈戰愈強，單計近20個球季，拜仁就贏得13屆冠軍，而今季經過19輪賽事後，佢哋已經領先次席嘅利華古遜16分（未計算周六凌晨戰果），歷史性德甲6連霸已成囊中物。拜仁喺德甲所向無敵，除咗該隊根基、財力同管理喺國內鶴立雞群外，多年來憑住大部分德國或德甲球員都渴望加盟嘅「夢想招牌」，免費或廉價掠奪其他德甲球隊嘅精英，一來符合經濟效益，二來可以即時削弱競爭對手實力，確保王朝不倒。
直接削弱競爭對手
德國權威嘅《轉會市場》網站，本周就回顧咗拜仁近20年來免費掠奪到嘅最佳11人陣容（見附表），當中包括目前仍然在陣嘅羅拔利雲度夫斯基同施巴斯坦魯迪，仲有即將喺今夏加盟嘅史浩克04王牌哥列斯卡，入圍嘅11人中，仲包括今季升任拜仁體育經理嘅沙歷咸美斯。呢份名單當中，史浩克同漢堡似乎係最大受害者，但唔好忘記呢份名單只係揀免費簽入嘅球員，拜仁近年亦以低於市價買入咗多名競爭對手嘅主力，利華古遜同多蒙特都係最大苦主，包括史浩克嘅門神紐亞（2011）、多蒙特金童馬里奧葛斯（2013）同中堅曉姆斯（2016）、雲達不來梅嘅比沙路（2001）同高路斯（2007），仲有利華古遜嘅羅拔高華（2001）、波歷克、薛羅拔圖（2002）同盧斯奧（2004）……呢批收購大部分削弱咗原來嘅主要競爭對手，多年來都咁有效。不過冇得羨慕，因為大多數德國球員自細都視入選國家隊同效力拜仁為兩大夢想，其他球會根本冇得學。