再砌拉素球證醒定
AC米蘭同拉素繼上仗意甲交鋒後，今晚意大利盃4強首回合再次碰頭，繼續由AC米蘭主場出擊。AC上仗靠前鋒柏德列古度尼用「上帝之手」入波，以2比1擊敗拉素，惹來極大爭議，球證及VAR（視像裁判）備受批評，今場肯定打醒十二分精神，甚至可能收緊執法尺度，隨時打亂比賽節奏，加上兩隊一周雙賽未必回得切氣，寧揀入球細。
（周四凌晨3時45分開賽）
AC米蘭取得3連勝，似乎有復甦迹象，但要留意其中兩場對手只係弱隊克羅托內及卡利亞里，「水分」甚重。再者AC上仗擊敗拉素亦帶幸運成分，因為球證及VAR（視像裁判）發雞盲，竟然判柏德列古度尼用手入波有效，賽後連AC教練加度素都承認唔應該判入波。經此一役後，球證今場一定睇到實，兩隊都好難偷雞。
至於拉素最大鑊係首席射手恩莫比尼養傷，呢位意大利國腳今季意甲已轟入20球，佔咗拉素35%聯賽入球，佢缺陣對球隊攻力影響有幾大可想而知。再睇埋拉素近4次作客對AC，只曾贏過1仗，其中3次總入球係2球或以下，揀入球細更穩陣。
飛燕諾主場恰慣PSV
另外，荷蘭盃8強飛燕諾主場對燕豪芬（PSV），飛燕諾早前簽入名將尹佩斯，加上近6次主場對燕豪芬，贏咗5次，主勝值博。（無綫myTV SUPER 302周四凌晨3時45分直播）西班牙盃4強首回合，雷加利斯上圈爆大冷淘汰皇馬，球員肯定心雄，今仗主場對西維爾，梗係要主攻乘勝追擊。西維爾整體實力勝一籌，並唔怕同對手駁火，首選入球大。
（周四凌晨4時30分開賽）