曼城防線欠穩
今晚英超尾場有聯賽「1哥」曼城主場鬥西布朗。曼城近期防線欠穩；西布朗剛於足總盃淘汰利物浦，士氣大振，為搶分護級唔會「泊大巴」，中位數3.5球嘅大盤有2倍夠和味。（Now 622及LeSports周四凌晨4時直播)
哥帥6.3億簽入中堅拿樸迪
「藍月亮」今季狂轟70球屬英超入波王，近7仗就每場至少攻入兩球。但要留意佢哋防線板櫈深度不足，隊長高柏尼傷愈冇耐，之前陣中得奧達文迪、文加拉同史東斯3名中堅，當中史東斯近期就頻頻犯錯導致失球，曼城近7仗失咗10球，認真唔穩陣。有見及此，哥帥對症下藥喺畢爾包簽入法國中堅拿樸迪，據報轉會費為破球會紀錄嘅5,700萬鎊（約6.3億港元），不過佢今日梗係趕唔切上陣，曼城後防演出難望有改善。
西布朗近期漸有起色，聯賽連盃賽近4仗3勝1和，包括上場足總盃作客攻力強勁嘅利物浦都贏3比2，前鋒積洛迪古斯近4仗入4球狀態極勇，況且西布朗中堅莊尼伊雲斯受傷，唔會咁蠢泊大巴求守到完場，兩軍合演入球騷機會極大。