曼聯踩場拔刺
英超周中快車今晚上演「Big 6」大戰，由熱刺主場火併曼聯。熱刺啱啱喺英足盃畀英乙紐波特郡逼和搞到要重賽，戰果或多或少反映佢哋今季飄忽嘅演出，加上熱刺首循環面對其餘Big 5球隊戰績算曳，只得1勝4負；客軍曼聯獲「A山」阿歷斯山齊士加盟後，進攻更靈活多變，熱刺有主場之利都未必有甜頭，曼聯受讓平半必捧1.9倍下盤！
（Now 621及LeSports周四凌晨4時直播）
哈利仔單天難保至尊
熱刺近期表現略見回落，繼上輪英超畀修咸頓先破門下，作客逼和對手僅得1分後，幾日前出戰英足盃再出現類似情況，又係先失波，爆冷畀英乙球隊紐波特郡賽和1比1。賽果反映熱刺防守唔集中之餘，亦顯示球隊進攻方面欠缺穩定性，尤其被寄予厚望嘅迪利阿里今季狀態極為反覆，影響球隊進攻強度，王牌射手哈利卡尼雖然連續4仗有波入，但中場大腦基斯甸艾歷臣據報有傷上陣成疑，喺缺乏支援情況下，今晚靠「哈神」單打獨鬥，未必佔到甜頭。
曼聯喺冬季轉會窗送走不受重用嘅米希達利恩，換嚟「A山」加盟，令莫連奴喺中前場嘅配搭有更多選擇，事實上「寸王」喺記者會都表示自己正陷入「幸福嘅抉擇」，而且呢位智利前鋒上仗英足盃首演表現對辦，貢獻兩個助攻協助球隊晉級，睇嚟佢同班波嘅默契建立得比想像中快，亦肯定可以為曼聯進攻注入新元素。
紅魔近5仗全勝冇失波
曼聯英超落後榜首曼城12分，爭標比較渺茫，但足球世界咩都有可能發生，最緊要做好自己，場場以3分為目標，先求收窄同曼城嘅差距。曼聯所有賽事已錄得5連勝兼冇失波，前鋒安東尼馬迪爾近3仗聯賽有波入，配合新兵「A山」及高大中鋒盧卡古，仲有位近期腳風勁順嘅連格，無論狀態同質素都唔輸蝕畀熱刺，今晚隨時贏埋仲得，受讓平半必捧下盤！