英超周中開快車，近期翻生嘅阿仙奴作客包尾「天鵝」史雲斯，兵工廠剛打入英聯盃決賽，士氣高昂，今場仲有新兵「MK仔」米希達利恩將會上演處子戰，令球隊如虎添翼，有力大炒史雲斯。阿仙奴讓一球，直取上盤。
（Now 622及LeSports周三凌晨3時45分直播）
阿仙奴清走「淤血」阿歷斯山齊士、禾確特，令球隊更團結，繼大炒水晶宮4比1後，上仗英聯盃4強次回合更反勝車路士殺入決賽，表現出今季少見嘅鬥心。兵工廠用A山換來嘅中場米希達利恩，今仗終於可以披甲，呢位阿美尼亞國腳傳射能力俱佳，卻被曼聯領隊莫連奴棄用，谷埋一肚冤屈氣，入「廠」首戰，梗係要大踢爭氣波。史雲斯早前爆冷擊敗利物浦，只因對手嚴重失準，不宜高估。「天鵝」近5次主場對阿仙奴，結果輸咗4次，其中近兩次共吞7蛋，睇怕今場都係凶多吉少。
利物浦防線穿窿吼大盤
另外，哈特斯菲爾德主場對利物浦，利物浦又恢復「羅賓漢」本色，近兩仗先係英超輸畀史雲斯，跟住英足盃被西布朗淘汰。尤其係上仗對西布朗，紅軍上半場已經失3球，猶如不設防，預計利物浦今場贏波都難保清白之身，最好揀中位數2.5球嘅入球大。
（Now 621及LeSports周三凌晨4時直播）