星將復出火力更強
上星期澳職球隊紐卡素噴射機作客墨爾本城，上演「強強對碰」後力保住個聯賽二哥席位。噴射機今日將會返主場面對另一支墨爾本球隊墨爾本勝利。噴射機今季面對強隊屢有佳績，反觀客隊墨爾本勝利今季雄心大減，今日更加有主力離隊削弱實力，衡量之下都係追捧主隊着數。
（有線64及203台周六下午2時35分直播）
噴射機今季踢咗18場聯賽，暫時只係輸咗4場，若果單睇主場成績更靚仔，10場錄得6勝2和2負，以主場計，全澳職排第2。陣容方面，噴射機今日更有右中場柏拉杜斯同埋養傷多時嘅主力箭頭奧當路雲傷愈復出，令到攻擊力立刻增強，再加上球會早前收購咗好波之人柏迪斯奧洛迪古斯，論火力隨時冠絕澳職。噴射機上次主場面對墨爾本勝利都係輕輕鬆鬆炒對手四個一皮，所以今日主場出擊，3分可謂手到拿來。
墨爾本勝利士氣低落
作客嘅墨爾本勝利儘管前排表現好似稍有起色，但勢估唔到佢哋居然放走中場主力米利根，咁情況下，對球隊爭取聯賽前6名，進身季後賽嘅影響都唔細。今日仲要有後防主力謝利亞停賽，條防線頂究竟仲頂唔頂得住噴射機嘅強攻？墨爾本勝利上一場被悉尼大炒後，士氣直插谷底，今日客場出擊，有可能再大敗一場。