由於曼市雙雄在周中英超快車賽果各異，「2哥」曼聯作客不敵熱刺0比2，被贏波嘅「藍月亮」曼城甩開至15分，點追？除非發生重大意外，否則今季英超錦標，幾近已成由哥迪奧拿率領嘅「藍月亮」囊中之物。
曼聯貴為勇奪英超冠軍次數最多球隊，自從傳奇領隊費格遜喺2013年宣布退休後，無論由莫耶斯、尹戈爾及現任主帥「寸王」莫連奴領軍，都未嘗再染指呢項錦標，但佢哋3人近幾年增兵嘅使費，相信已超過執教紅魔26載嘅費爵爺，可惜只收穫英足盃、英聯盃、歐霸盃及社區盾，在雄霸英超、2捧歐聯嘅費爵爺面前，不值一哂。雖然曼城主帥哥迪奧拿一擲千金重建球隊，但莫連奴上季接手曼聯後，同樣簽入保羅普巴、盧卡古及阿歷斯山齊士等高質素球星，何解同「藍月亮」相差咁遠？與「寸王」過於求穩嘅風格不無關係，特別係作客強隊先求唔輸嘅策略，反而造成連場不勝嘅局面，好似周中造訪熱刺一開波失守，即束手無策係最佳例子，相反哥帥採取主動爭勝，一失一得便形成雙方差距，到底「寸王」係咪已經江郎才盡呢？