奧巴美揚入廠禾確特倒戈
今晚英超尾場上演一場話題大戰，由阿仙奴主場對愛華頓，兩隊喺冬季轉會市場異常活躍，今仗都可能有新兵亮相，當中最矚目相信係奧巴美揚有冇料到，同埋禾確特倒戈能否向雲格還以顏色。樂比認為「兵工廠」仍需時間磨合新陣，讓到球半、兩球咁多，寧博下盤。
（Now 621及 LeSports周日凌晨1時30分直播）
阿仙奴喺轉會市場先後放走阿歷斯山齊士及基奧特，換番嚟米希達利恩及奧巴美揚呢對前多蒙特孖寶，得與失就真係見仁見智，但最肯定嘅係競爭對手曼聯同車路士喺呢次交易中都提升咗實力，到頭來阿仙奴有冇着數就真係要拭目以待，但見到雲格終肯使錢，相信廠迷亦感到安慰。
雲格要時間為前線分工
阿仙奴短期內最需要解決嘅係排陣問題，如何安排拿卡錫迪、奧巴美揚、米希達利恩及奧斯爾（MOLA）四位攻擊球員嘅分工，係雲格迫切需要處理嘅工作，畢竟足球場上一加一唔係等於二，新組合發唔發揮到化學作用就真係要夾過至知，而奧巴美揚喺德甲雖然有亮麗嘅入球紀錄，但老實講佢今季嘅發揮並唔算太理想，尤其係把握力仲有好大嘅提升空間，尋日亦有消息話佢帶病在身，雲格都話要賽前至決定派唔派佢登場。
對手愛華頓嘅變動比阿仙奴來得更快，首先「大SAM」艾拿戴斯喺去年底加盟重組球隊，冬季轉會亦簽入辛克杜辛、禾確特及文加拉三名球員，前、中、後三線都得以補強，其中禾確特周中對李斯特城表現身價，梅開二度助球隊全取3分，而從曼城借用嘅中堅文加拉係隊中少有嘅左腳後衞，無論拍米克堅尼或菲臘積基爾卡踢雙中堅都更加穩固，似乎3個都係唔錯嘅收購。
阿仙奴海鮮波遇弱欠穩
老實講，大SAM有幾多料大家都心知肚明，佢嘅簡單直接踢法，係可以喺短期內提升到球隊嘅成績，而佢接手後愛華頓亦由下游位置升番到第9位，可見佢係有一定功力，阿仙奴畀人嘅感覺始終係海鮮味太重，而且防線又會失驚無神派膠，上月先後爆冷輸畀般尼茅夫及史雲斯，可見佢哋對弱隊讓波絕對唔穩陣，今場對愛華頓讓得多絕對有隱憂。